(၁၃)နှစ်သမီးလေး သေဆုံးစေခဲ့သည့် လောင်းလုံးမြို့နယ်မှ မိုင်းထောင်ဖောက်ခွဲအကြမ်းဖက်မှု၏ တရားခံအချို့ကို ဖမ်းဆီးရမိ
942
Iris (NP News) - စက်တင်ဘာ ၂၆
အသက်(၁၃)နှစ်အရွယ်သာရှိသေးသော အမျိုးသမီးငယ်လေးသေဆုံးမှုဖြစ်စေခဲ့ရသည့် တနင်္သာရီတိုင်းဒေသကြီး လောင်းလုံးမြို့နယ်ရှိ ကျေးရွာတစ်ရွာမှ လက်လုပ်မိုင်းပေါက်ကွဲမှု၏ ကျုးလွန်သူအကြမ်းဖက်သမားများကို ဖမ်းဆီးရမိခဲ့ပြီဖြစ်ကြောင်း သတင်းရရှိသည်။
တနင်္သာရီတိုင်းဒေသကြီး လောင်းလုံးမြို့နယ် သောကြာပြင်ကျေးရွာ ဆင်မင်းရပ်ကွက်ရှိ ရပ်ကွက်အုပ်ချုပ်ရေးမှူး အိမ်ရှေ့တွင် စက်တင်ဘာ(၂၁)ရက်က မိုင်းထောင်ထားမှုမှပေါက်ကွဲခဲ့ခြင်းဖြစ်ပြီး မိုင်းထောင်ကြသူလေးဦးထဲမှ တစ်ဦးကို ဖမ်းဆီးရမိခဲ့ခြင်းဖြစ်ကြောင်း သတင်းမှန်ပြန်ကြားရေးက စက်တင်ဘာ(၂၆)ရက်တွင် သတင်းထုတ်ပြန်သည်။ ထုတ်ပြန်ချက်အရ သောကြာပြင်ကျေးရွာ ဆင်မင်းရပ်ကွက်အုပ်ချုပ်ရေးမှူးနှင့် ဇနီးဖြစ်သူ ဒေါ်ကြည်ဌေး၏တူမဖြစ်သူ အသက်(၁၃)နှစ်အရွယ် မအိအိငယ်က စက်တင်ဘာ(၂၁)ရက် နံနက်ပိုင်း၌ ခြံစည်းရိုးအနီးတွင် ပန်းခူးနေရင်းမှ မိုင်းပေါက်ကွဲမှုအတွင်း ပါဝင်သေဆုံးသွားခဲ့ရကြောင်း သိရသည်။ တစ်ရွာတည်းနေ အကြမ်းဖက်သမား(၄)ဦးက ကျေးရွာအုပ်ချုပ်ရေးမှူး၏ ခြံစည်းရိုး၌ မိုင်းထောင်ခဲ့ခြင်းမျိုးဖြစ်ပြီး အဆိုပါမိုင်းက ပေါက်ကွဲခဲ့ပြီး မအိအိငယ်ကိုမိုင်းစထိမှန်ကာ သေဆုံးစေခဲ့ကြောင်း၊ အဒေါ်ဖြစ်သူ ဒေါ်ကြည်ဌေးမှာမူ မိုင်းစထိမှန်ဒဏ်ရာများ ရရှိခဲ့ပြီး ထားဝယ်ပြည်သူ့ဆေးရုံ၌ ဆေးကုသမှုခံယူနေရကြောင်း သိရသည်။ အဆိုပါဖြစ်စဉ်ကြောင့် လုံခြုံရေးတပ်ဖွဲ့ဝင်များက အသေးစိတ်စုံစမ်းဖော်ထုတ်မှုများ လုပ်ဆောင်ခဲ့ပြီး စက်တင်ဘာ(၂၂)ရက်တွင် တစ်ရွာတည်း၊ တစ်လမ်းတည်းနေ စိုးမင်းထွေးဆိုသူကို စစ်ဆေးဖော်ထုတ်နိုင်ခဲ့ပြီး အခြားသူများဖြစ်သော ဟိန်းသူအောင်၊ ကျော်စိုးနှင့် စောရွှေတို့ သုံးဦးလည်း မိုင်းထောင်မှုတွင်ပါဝင်ခဲ့ကြောင်း သိရသည်။ သို့သော်လည်း လေးဦးထဲမှ တစ်ဦးကိုသာ ဖမ်းဆီးနိုင်ခဲ့ခြင်းမျိုးဖြစ်ပြီး ကွင်းဆက်တရားခံများမှာ လွတ်မြောက်နေကြောင်းလည်း ဆိုသည်။
အဆိုပါအခင်းဖြစ်စဉ်အရ အုပ်ချုပ်ရေးမှူးကို လုပ်ကြံမိုင်းခွဲရန်ရည်ရွယ်ထားသည့်ဖြစ်စဉ်မှ မဆိုင်သည့်အသက်(၁၃)နှစ်အရွယ်သာရှိသေးသော အမျိုးသမီးငယ်တစ်ဦး သေဆုံးရခြင်းမျိုးဖြစ်ခဲ့ပြီး လွတ်မြောက်နေသော တရားခံများကိုလည်း ဖမ်းဆီးရမိနိုင်ရေး ကြိုးပမ်းလျှက်ရှိကြောင်း သိရသည်။