နောက်ဆုံးထွက်သက်မတိုင်မီ မဖြစ်မနေကြည့်သင့်သည့် ကမ္ဘာကျော်ဟောလီဝုဒ်ရုပ်ရှင်ဇာတ်ကားကောင်းများ
1204
ဝတီ(NP News)- အောက်တိုဘာ ၆
ရုပ်ရှင်ဇာတ်ကားတစ်ကားသာ တကယ်ကောင်းတယ်ဆိုရင် အဲဒီဇာတ်ကားကိုကြည့်ချင်တဲ့ပရိ သတ်တွေကြိတ်ကြိတ်တိုးနေမှာပါပဲ။ ဒါပေမဲ့လူတစ်ကိုယ်အကြိုက်တစ်မျိုးဖြစ်လို့ အဲဒီလူအမျိုးမျိုးအတွက် ရုပ်ရှင်ဇာတ်ကားအမျိုးအစားလည်း အမျိုးမျိုးဖြစ်နေတော့တာပေါ့။ စစ်ကား၊ အချစ်ကား၊ အက်ရှင်ကား၊ မိသားစုကား၊ ဟာသကား ဘယ်လိုပဲ အမျိုးမျိုးအစားစားဖြစ်နေပါစေ လက်တွေ့ဘဝနဲ့ နီးစပ်တယ်၊ သဘာဝကျတယ်ဆိုရင်တော့ ပရိသတ်ကကြိုက်မှာချည်းပါပဲ။ ဒါကြောင့် အခုတစ်ခေါက်မှာတော့နောက်ဆုံးထွက်သက်မတိုင်ခင် မဖြစ်မနေကြည့်သင့်တဲ့ ကမ္ဘာကျော်ဟောလီဝုဒ်ဇာတ်ကားကောင်းတချို့ကို ဖော်ပြလိုက်ပါတယ်။
Mr and Mrs Smith
ဒီဇာတ်ကားကို မကြည့်ဖူးရင်တောင် ဇာတ်ကားနာမည်မကြားဖူးတဲ့ရုပ်ရှင်ပရိသတ်ရယ်လို့ ရှိမှာမ ဟုတ်ပါဘူး။ ၂ဝဝ၅ ခုနှစ်မှာ ထွက်တဲ့ဒီဇာတ်ကားထဲမှာအဓိက သရုပ်ဆောင်တွေက ဘရက်ဒ်ပစ်နဲ့ အိန်ဂျလီနာဂျိုလီဖြစ်တယ်ဆိုတာကိုလည်းရုပ်ရှင်ပရိသတ်တွေ သိပြီးသားဖြစ်နေကြမှာပါ။ ဒီရုပ်ရှင်ကတော့ တစ်ယောက်နဲ့တစ်ယောက်သူလျှိုမှန်းမသိဘဲ လက်ထပ်လိုက်မိတဲ့ သူလျှိုနှစ်ယောက်အ ကြောင်းကိုရိုက်ကူးထားတာပါ။ နှစ်ယောက်လုံးက လျှို့ဝှက်သူလျှိုတွေဆိုပေမယ့် ပြိုင်ဘက်အဖွဲ့အ စည်းအတွက် အလုပ်လုပ်ပေးနေတဲ့သူလျှိုတွေဖြစ်နေကြပါတယ်။ အမိုက်စားစတန့်ကွက်တွေ၊ ခေါင်းဆောင်ဇာတ်ဆောင်နှစ်ယောက်ရဲ့အလိုက်ဖက်ဆုံး သရုပ်ဆောင်ချက်တွေကြောင့် ဒီဇာတ် ကားကနာမည်ကြီးတာပါ။
The Man from Earth
၂ဝဝ၇ ခုနှစ်မှာထွက်တဲ့ ဒီဇာတ်ကားတစ်ကားလုံးကို Oldman (အိုးလ်ဒ်မန်း)လို့ခေါ်တဲ့ ပုဂ္ဂိုလ်ရဲ့အိမ်ထဲမှာနဲ့အဲဒီအိမ်တဝိုက်မှာပဲ ရိုက်ကူးထားတာဖြစ်ပါတယ်။ အိုးလ်ဒ်မန်းရဲ့ နှုတ်ဆက်ပွဲမှာ
သူနဲ့တခြားလုပ်ဖော်ကိုင်ဖက်တွေ ဘယ်လိုစကားပြောငြင်းခုံကြတယ်ဆိုတာကို ဇာတ်ကားက သရုပ်ဖော်သွားတာဖြစ်ပါတယ်။ ဇာတ်ကားတစ်ကားလုံးကို ဒိုင်ယာလော့ဂ်တွေနဲ့ပဲ အဓိက ပုံဖော်သွားပြီး ပရိသတ်တွေကို ဒိုင်ယာလော့ဂ်တွေနဲ့ ဘယ်လိုဆွဲဆောင်သွားတယ်ဆိုတာ အံ့သြစရာတွေ့မြင်ရမှာပါ။
Gangs of New York
မင်းသားကြီး လီယိုနာဒိုရဲ့ဇာတ်ကားတွေထဲမှာ ဒီကားကလည်း မကြည့်မဖြစ်ကြည့်သင့်တဲ့ဇာတ် ကားတစ်ကားပါပဲ။ ဒီကားက ၁၈၆၃ ခုနှစ်၊ နယူးယောက်မြို့ကြီး စပေါ်လာချိန်အကြောင်းနဲ့ အဲဒီအချိန်မှာ လူဆိုးဂိုဏ်းအဖွဲ့တွေက မြို့ကိုအုပ်ချုပ်မင်းမူနိုင်ဖို့ ဘယ်လိုအပြိုင်အဆိုင် ကြိုးစားကြတယ်ဆိုတာ ကြည့်ရှုခံစားရမှာပါ။ ဒီကားကိုကြည့်ရင် သမိုင်းကြောင်းကို သိရမယ့်အပြင် စွန့်စား ခန်းတွေလည်းအများကြီး တွေ့ရဦးမှာဖြစ်ပါတယ်။
Wendy and Lucy
၂ဝဝ၈ ခုနှစ်မှာထွက်တဲ့ ဒီဇာတ်ကားကတော့ ကံဆိုးမသွားရာ မိုးလိုက်လို့ရွာဆိုတဲ့စကားအတိုင်း ကံဆိုးမိုးမှောင်ကျတာတွေ ဆက်တိုက်ကြုံရပြီးတဲ့နောက်ငွေရေးကြေးရေး အခက်အခဲအများကြီး တွေ့ခဲ့ရတဲ့ မိန်းကလေးတစ်ယောက်အကြောင်း ရိုက်ထားတာပါ။ ထူးခြားတဲ့အချက်ကတော့ ဒီဇာတ်ကားကို ဘတ်ဂျက်နည်းနည်းလေးနဲ့ ရိုက်ထားတာဖြစ်ပေမယ့် မဖြစ်မနေ ကြည့်သင့်တဲ့ဟော လီဝုဒ်ဇာတ်ကားတွေထဲမှာ ပါနေတာပါပဲ။
The Dark Knight
၂ဝဝ၈ ခုနှစ်မှာပဲထွက်တဲ့ ဒီဇာတ်ကားကို ကြည့်ကြည့်လိုက်ရင်ဟီးရိုးကားဆို မကြိုက်ဘူးဆိုတဲ့ လူတွေတောင် ကြိုက်သွားပါလိမ့်မယ်။ စူပါဟီးရိုးဇာတ်ကားလောကကို ဒီရုပ်ရှင်ကားက လုံးဝပြောင်းပစ် လိုက်တာပါ။
Fight Club
၁၉၉၉ ခုနှစ်မှာထွက်တဲ့ ဒီဇာတ်ကားကတော့ ကိုယ့်ဘဝကို ပြောင်းလဲပစ်နိုင်ဖို့ နည်းလမ်းရှာနေတဲ့ ရုံးဝန်ထမ်းတစ်ယောက် လောကကြီးမှာ ဘာအပူအပင်မှမရှိတဲ့လူတစ်ယောက်နဲ့ ဆုံမိသွားပြီး မြေအောက်အဖွဲ့တစ်ဖွဲ့တည်ထောင်မိသွားပုံကိုရိုက်ထားတာပါ။ အဲဒီကနေပြီး ဇာတ်လမ်းဟာဇာတ် ရှိန်တက်လာပြီးစိတ်ဝင်စားဖို့ သိပ်ကောင်းလာပါတယ်။ အဓိကဇာတ်ဆောင်က သရုပ်ဆောင် အ ရမ်းကောင်းပြီး ဇာတ်လမ်းဇာတ်အိမ်ကရော ဘယ်လောက် ကောင်းသလဲဆိုတာ သိချင်ရင်တော့ ဇာတ်ကားကိုသာ ကြည့်လိုက်ပါလို့ညွှန်းပါရစေ။ ဒီဇာတ်ကားဟာ ရှေးဟောင်းဇာတ်ကားဆိုပေမယ့် ဂန္တဝင်မြောက်ဇာတ်ကားလည်း ဖြစ်နေပါပြီ။
Predestination
၂ဝ၁၄ ခုနှစ်မှာထွက်တဲ့ ဒီဇာတ်ကားက ဝက်ဝက်ကွဲလူကြိုက်များပါတယ်။ ဇာတ်လမ်းကတော့ အေး ဂျင့်တစ်ယောက်ကို အတိတ်ကာလ ၁၉၇၅ ခုနှစ် ဆီပြန်လွှတ်ပြီး နယူးယောက်မှာဖြစ်မယ့် ဗုံးခွဲတိုက် ခိုက်မှုမဖြစ်လာအောင်တားဆီးခိုင်းတဲ့အကြောင်းပါ။
V for Vendetta
၂ဝဝ၅ ခုနှစ်မှာထွက်တဲ့ ဒီဇာတ်ကားကတော့ ဂျာမနီကို ဟစ်တလာအုပ်စိုးခဲ့စဉ်အကြောင်းကို ပုံဖော်ရိုက်ကူးထားတာပါ။ အဲဒီမှာလူတစ်ယောက်ကဗီဆိုတဲ့ နာမည်နဲ့လျှို့ဝှက်လှုပ်ရှားနေပြီး လွတ် လပ်ရေးအတွက်တိုက်ပွဲဝင်နေပါတယ်။ သူကမိန်းမပျိုလေးတစ်ယောက်ရဲ့ အကူအညီနဲ့အစိုးရကိုဖြုတ်ချဖို့ အစီအစဉ်သေသေချာချာ ဆွဲခဲ့ပါတယ်။ သူစီစဉ်ထားတဲ့အတိုင်း ဖြစ်လာမလားဆိုတာကိုတော့ဇာတ်ကားကို ကြည့်ကြည့်လိုက်ရင်သိသွားမှာပါ။
Inception
၂ဝ၁ဝ ခုနှစ်မှာထွက်တဲ့ ဒီဇာတ်ကားကလည်း လီယိုနာဒို ပရိသတ်တွေမကြည့်မဖြစ်ကြည့်သင့်တဲ့ဇာတ်ကားလည်းဖြစ်နေပြန်ပါတယ်။ လုပ်ငန်းကြီးတွေရဲ့လျှို့ဝှက်ချက်တွေကို သိပ္ပံစိတ်ကူးယဉ် နည်းပညာတစ်မျိုးသုံးပြီး ခိုးယူလေ့ရှိတဲ့သူခိုးတစ်ယောက်ရှိပါသတဲ့။ အဲဒီနည်းပညာကတော့ လုပ် ငန်းရှင်ကြီးတွေရဲ့ အိပ်မက်ထဲထိဝင်ပြီး သူတို့လုပ်ငန်းလျှို့ဝှက်ချက်တွေကို ခိုးယူတာပါပဲ။ စီအီးအိုတစ်ယောက်ရဲ့ ခေါင်းထဲကို အိုင်ဒီယာတစ်ခု ထည့်ပေးရမယ့် တာဝန်ဟာအဲဒီအဆင့်မြင့်သူခိုးရဲ့ ပခုံးပေါ်ကျလာပါသတဲ့။ ဒီဇာတ်ကားကိုကြည့်လိုက်ရင်အချိန်တစ်နာရီခွဲကျော် ဘယ်လိုကုန်လို့ကုန်သွားမှန်းတောင် သိလိုက်မှာမဟုတ်ပါဘူး။ ဇာတ်ကားက အဲဒီလောက်ထိကိုကောင်းပါတယ်။
Into the Wild
၂ဝဝ၇ ခုနှစ်မှာထွက်တဲ့ ဒီဇာတ်ကားကတော့ ဇာတ်အိမ်ထူးခြားပေမယ့် သိပ္ပံစိတ်ကူးယဉ်ဇာတ် ကားမဟုတ်ဘဲ သဘာဝကျတဲ့ဇာတ်ကားလေးပါ။ အတန်းထဲမှာ အတော်ဆုံးကျောင်းသားဖြစ်ပြီး
အားကစားသမားလည်းဖြစ်တဲ့ ကောင်လေးက သူ ပိုင်ဆိုင်တာအားလုံးကို စွန့်လွှတ်လိုက်ပါတယ်။ သူစုဆောင်းထားသမျှ ဒေါ်လာနှစ်သောင်းလေးထောင်လုံးကိုကုသိုလ်ဖြစ်အဖွဲ့အစည်းတစ်ခုကို လှူပစ်လိုက်ပါတယ်။ ပြီးတော့တောရိုင်းသဘာဝထဲမှာနေဖို့ဆိုပြီး အလက်စ်ကာပြည်နယ်ကို ကားကြုံလိုက်သွားပါတော့တယ်။ လမ်းတစ်လျှောက် သူတွေ့ရတဲ့ဇာတ်ကောင်တွေက သူ့ဘဝကိုဘယ်လိုပုံဖော်ပေးသွားတယ်ဆိုတာဇာတ်ကားမှာ ကြည်ရှုခံစားရမှာဖြစ်ပါတယ်။
#NPNews