ငလျင်ဘေးကို အခွင့်ကောင်းယူ၍ အကြမ်းဖက်တိုက်ခိုက်မှုများ၊ နိုင်ငံရေးအမြတ်ထုတ်လိုမှုများ ရှိနေ
343
ချယ်ရီ (NP News) - ဧပြီ ၃
ငလျင်ဘေးဒဏ်သင့်နေချိန်ကိုအခွင့်ကောင်းယူ၍ PDF တို့၏ အကြမ်းဖက်တိုက်ခိုက်မှုများနှင့် နိုင်ငံရေးအမြတ် ထုတ်လိုမှုများ အပါအဝင် ပြည်ပမီဒီယာအချို့၏ မြေပြင်အခြေအနေအမှန်နှင့်မတူ တစ်ဖက်သတ် လုပ်ကြံစွပ်စွဲ ရေးသားဖော်ပြနေမှုများရှိနေကြောင်း နိုင်ငံတော်စီမံအုပ်ချုပ်ရေးကောင်စီ၏ သတင်းထုတ်ပြန်ချက်အရ သိရသည်။
ငလျင်ဘေးဒဏ်ကြောင့် တပ်မတော်သားများ၊ မြန်မာနိုင်ငံရဲတပ်ဖွဲ့ဝင်များ၊ မီးသတ်တပ်ဖွဲ့ဝင်များ၊ လူမှုရေးအသင်း အဖွဲ့များ၊ တစ်သီးပုဂ္ဂလကူညီကယ်ဆယ်သူများက ပြည်ပနိုင်ငံများမှ ကူညီကယ်ဆယ်ရေးအဖွဲ့များနှင့်အတူ ဘေးသင့်ပြည်သူများအား ကူညီကယ်ဆယ်ရေးလုပ်ငန်းများကို နေ့ညမနား ဆောင်ရွက်နေရသည့်အတွက် လုံခြုံရေးလုပ်ငန်းများ အားနည်းနေမှုကို အခွင့်ကောင်းယူကာ လျှပ်စစ်ဓာတ်အားခွဲရုံတစ်ခုအား PDF အကြမ်းဖက် သမားများနှင့် လက်နက်ကိုင်အကြမ်းဖက်သောင်းကျန်းသူများက အင်အားအလုံးအရင်းဖြင့် ဝင်ရောက်တိုက်ခိုက်ခဲ့ ကြောင်း ထုတ်ပြန်ထားသည်။
ထို့ပြင် အင်အားအနည်းငယ်သာရှိသည့် လုံခြုံရေးကင်းစခန်းတစ်ခုကို အင်အားအလုံးအရင်းဖြင့် ဝင်ရောက် တိုက်ခိုက်ခဲ့ခြင်း၊ ကူညီကယ်ဆယ်ရေးယာဉ်ကို ချောင်းမြောင်းတိုက်ခိုက်ခြင်း နှင့် မြန်မာနိုင်ငံရဲတပ်ဖွဲ့ဝင်များကို ချောင်းမြောင်းပစ်ခတ်ခြင်းတို့အား လုပ်ဆောင်လာခဲ့ကြောင်း ထုတ်ပြန်ချက်တွင် ဖော်ပြထားသည်။
ထိုသို့ လုပ်ဆောင်ခဲ့ရမှုအပေါ် အကြမ်းဖက်အုပ်စုဖြစ်သည့် NUG အဖွဲ့၊ နိုင်ငံတော်အစိုးရကို ဆန့်ကျင်နေသည့် အွန်လိုင်းမီဒီယာများနှင့် ပြည်ပမီဒီယာအချို့က ပုံကြီးချဲ့ကားကာ ငလျင်ဘေးဒဏ်သင့်နေချိန်တွင်ပင် တပ်မတော်မှ လေကြောင်းတိုက်ခိုက်မှုများကို ဆက်လက်လုပ်ဆောင်လျက်ရှိကြောင်းဖြင့် မြေပြင်အခြေအနေအမှန်ကို မသိရှိဘဲ တစ်ဖက်သတ်လုပ်ကြံ စွပ်စွဲရေးသားဖော်ပြနေမှုများကို တွေ့ရှိနေရကြောင်း ထုတ်ပြန်ထားသည်။
လက်ရှိငလျင်ဘေးကြောင့် ပြည်သူများဒုက္ခရောက်နေချိန်တွင် လူသားချင်းစာနာစိတ်ကင်းမဲ့စွာဖြင့် နိုင်ငံရေး အမြတ်ထုတ်လိုမှု တစ်ခုကိုသာရှေးရှု၍ အကြမ်းဖက်တိုက်ခိုက်မှုများ ဆက်လက်လုပ်ဆောင်နေသည့် NUG အဖွဲ့၊ ၎င်းတို့၏ လက်ဝေခံ PDF အမည်ခံအကြမ်းဖက်အဖွဲ့များနှင့် လက်နက်ကိုင်အကြမ်းဖက်သောင်းကျန်းသူများကို မြန်မာနိုင်ငံအစိုးရ နှင့် မြန်မာနိုင်ငံသူနိုင်ငံသားများက ပြင်းပြင်းထန်ထန်ကန့်ကွက်ရှုတ်ချကြောင်း နစကမှ ထုတ်ပြန်ထားသည်။
ပြည်တွင်း၊ပြည်ပအဖွဲ့အစည်းများလည်း ၎င်းတို့၏ အကြမ်းဖက်လုပ်ရပ်များကို သတိထားစောင့်ကြည့်၍ လူမဆန်သည့် အကြမ်းဖက်လုပ်ရပ်များကို အားပေးအားမြှောက်ပြုရာရောက်သည့် ပြောဆိုရေးသားဖော်ပြမှုများကို သတိပြုရှောင်ကြဉ်သင့်ပြီး တပ်မတော်အနေဖြင့် ငြိမ်းချမ်းရေးအတွက် အမြဲတမ်း လမ်းဖွင့်ပေးထားလျက်ရှိကြောင်း ထုတ်ပြန်ချက်တွင် ရေးသားထားသည်။
ထို့ကြောင့် ငြိမ်းချမ်းရေးကိုခုတုံးလုပ်၍ နိုင်ငံရေးအမြတ် မထုတ်ရန်လိုအပ်ပြီး မဟုတ်မမှန် စွပ်စွဲထုတ်ပြန်မှုများကို ရှောင်ကြဉ်သင့်ကြောင်း နစကမှ အသိပေးထုတ်ပြန်ထားသည်။