လက်ရှိအသုံးပြုနေသည့် တိုင်းရင်းဆေးခန်းသုံး ဆေးအဖုံများကို ကိုဗစ်-၁၉ ရောဂါကုသမှုတွင် စမ်းသပ်အသုံးပြုရန်စီစဉ်နေ
1086
NP News - စက်တင်ဘာ ၃
နိုင်ငံတကာတွင်လည်း ဆေးဖက်ဝင်အပင်များဖြင့် ကိုဗစ်-၁၉ ရောဂါအတွက်အသုံးပြုရန် သုတေသနများ ပြုလုပ် သည်ကိုတွေ့ရှိရပြီဖြစ်သည့်အတွက် မြန်မာနိုင်ငံတွင်လည်း တိုင်းရင်းဆေးကို ကိုဗစ်-၁၉ ရောဂါအား ကာကွယ်၊ကုသရေးလုပ်ငန်းများတွင် စနစ်တကျ စမ်းသပ်အသုံးပြုရန်စီစဉ်နေကြောင်းသိရသည်။
စက်တင်ဘာလ (၂) ရက်က ကျင်းပသည့် တိုင်းရင်းဆေးဝါးများအသုံးပြုရေးနှင့်ပတ်သက်၍ သုတေသနလုပ်ငန်းများ ဆောင်ရွက်နိုင်ရေးဆိုင်ရာ ညှိနှိုင်းအစည်းအဝေးတွင် ကျန်းမာရေးဝန်ကြီး ဌာန ပြည်ထောင်စုဝန်ကြီး ဒေါက် တာသက်ခိုင်ဝင်းက ပြောကြားခဲ့ခြင်းဖြစ်သည်။
“တိုင်းရင်းဆေးကျမ်းတွေမှာ အရင်က အဖျားရောဂါတွေနဲ့ပတ်သက်ပြီး ကုသခဲ့တဲ့တိုင်းရင်းဆေးဝါးတွေရှိပါတယ်။ မာဓဝနိဒါန်းဆေးကျမ်းတွေမှာလည်း ဝိသမအဖျား အမျိုးမျိုးအတွက် ဆေးခါးကြီးပါဝင်တဲ့ တိုင်းရင်းဆေးဖုံနဲ့ ဖော် စပ်အသုံးပြုထားတာကိုတွေ့ပါတယ်။ ဒါကြောင့် တိုင်းရင်းဆေးဝါးတွေကို ပြန်လည်ဖော်ထုတ်ပြီး ကိုဗစ်-၁၉ ရောဂါမှာ အသုံးပြုနိုင်ဖို့ ဆောင်ရွက်သင့်ပါ တယ်” ဟု ယင်းကပြောသည်။
ကိုဗစ်-၁၉ ရောဂါအတွက်အသုံးပြုမည့် တိုင်းရင်းဆေးဝါးကို Clinical Research လုပ်ရန်လိုအပ်မည်ဖြစ်ပြီး သုတေ သနလုပ်ငန်းများ ဆောင်ရွက်ရာတွင် ဆေးသုတေသနဦးစီးဌာနနှင့်တပ်မတော်ဆေးသုတေသနတပ်တို့က ပူးပေါင်းဆောင်ရွက်ပေးမည်ဖြစ်ကြောင်း သိရသည်။ ဆက်လက်၍ ဒေါက်တာသက်ခိုင်ဝင်းက “ရေရှည်မှာ ဆေးခါးကြီးလိုဆေးဖက်ဝင်အပင်တွေ၊ ကုန်ကြမ်းတွေလုံလောက်စွာရရှိနိုင်ဖို့အတွက် ဆေးပင်တွေကို အဆင့်မြင့်နည်းပညာနဲ့ စိုက်ပျိုးထုတ်လုပ်ဖို့ လိုအပ်မှာဖြစ်ပါတယ်”ဟု ပြောသည်။
တိုင်းရင်းဆေးရုံ/ဆေးကုဌာနများတွင် ကိုဗစ်-၁၉ Asymptomatic to Mild Symptoms လူနာများအားတိုင်းရင်းဆေးဝါးများတိုက်ကျွေးရန်စီစဉ်ထားပြီး ရေရှည်တွင်ကုန်ကြမ်းများရရှိရန် ဆေးခါးကြီးပင်များကို တိုင်းရင်းဆေး ပညာဦးစီးဌာနရှိ ပရဆေးဥယျာဉ် (၈) ခု၌ စိုက်ပျိုးထားကြောင်း သိရသည်။ ထို့ပြင် ၂ဝ၂ဝ ပြည့်နှစ် မတ်လမှစ၍ တိုင်းရင်းဆေးနှင့်ပတ်သက်၍ နနွင်း၊ သစ်ကြံပိုး၊ တမာ၊ ချင်း၊ နွယ်ချိုတို့၏ Acute Toxicity, Heavy Metals, Immunomodulatory, Antiinflammatory Test များ ဆောင်ရွက်ထားကြောင်းသိရသည်။
#NPNews