မြန်မာ-တရုတ်နယ်စပ်ကုန်သွယ်ရေးအတွက်အရေးပါသည့် ဧရာဝတီမြစ်ကူး(ဗလမင်းထင်)တံတား အမှတ်(၂)စတင်တည်ဆောက်
1582
NP News - အောက်တိုဘာ ၁၇
ကချင်ပြည်နယ်၊ မြစ်ကြီးနားမြို့ရှိ ဧရာဝတီမြစ်ကူး(ဗလမင်းထင်)တံတားအမှတ်(၂) ပန္နက်တော် တင်မင်္ဂလာကို အောက်တိုဘာလ (၁၆)ရက်ကကျင်းပခဲ့ပြီး အဆိုပါတံတားသည် မြန်မာ-တရုတ်နယ် စပ်ကုန်သွယ်ရေးအတွက်အရေးပါသည့်လမ်းကြောင်းတစ်ခုလည်းဖြစ်ကြောင်း သိရသည်။
အဆိုပါတံတားတည်ဆောက်ရန်အတွက် ၂ဝ၂၁ ခုနှစ်တွင် အကြိုအင်ဂျင်နီယာလုပ်ငန်းများစတင် ဆောင်ရွက်ခဲ့ပြီး ၂ဝ၂ဝ-၂ဝ၂၁ ဘဏ္ဍာနှစ် ပြည်ထောင်စု ငွေလုံးငွေရင်းရန်ပုံငွေမှ ငွေကျပ်သန်း (၁ဝဝဝ) ခွဲဝေချထားပေးခဲ့ကြောင်းသိရသည်။
အဆိုပါ ဧရာဝတီမြစ်ကူး(ဗလမင်းထင်)တံတားအမှတ်(၂)သည် မြန်မာ -တရုတ် နယ်စပ်ကုန်သွယ်မှုလမ်းကြောင်း (ကန်ပိုက်တီနယ်စပ်ကုန်သွယ်မှုလမ်းကြောင်း)ပေါ်တွင်တည်ရှိပြီး ဆောက်လုပ်ရေးဝန်ကြီးဌာန၊ တံတားဦးစီးဌာန၊ တည်ဆောက်ရေး အဖွဲ့(၁)၊ တံတားအထူးအဖွဲ့(၁)မှ တည်ဆောက်ကာ စုစုပေါင်းတံတားအရှည် ၃၂၁၂.ဝ၉၉ ပေ(၉၇၉ မီတာ)ရှိမည်ဖြစ်ကြောင်း သိရသည်။ တံတားအ မျိုးအစားသည် သံကူကွန်ကရစ် ရေလည်တိုင် နှင့် သံကူကွန်ကရစ်ကမ်းကပ်ခုံဖြစ်ပြီး ယာဉ်သွားလမ်းအကျယ် (၂၇ ပေ ၁ဝ လက်မ) (၈ ဒသမ ၅ မီတာ)၊ လူသွားလမ်းအကျယ်တစ်ဖက်လျှင် (၃ ပေ ၄ လက်မ) (၁ မီတာ)၊ ရေလမ်းကင်း လွတ်အကျယ် (၃၅ဝ)ပေ၊ ရေလမ်းကင်းလွတ်အမြင့် (၂၆ ပေ ၃ လက်မ)(၈ မီတာ)ရှိရာ အဆိုပါတံတားတည်ဆောက်ပြီးပါက ဒေသတွင်းလမ်းပန်းဆက်သွယ်ရေးနှင့် နယ်စပ် ကုန်သွယ်စီးဆင်းမှုကို ပိုမိုထိရောက်ကောင်းမွန်စေမည်ဖြစ်ကြောင်းသိရသည်။
လက်ရှိတွင် အသုံးပြုနေသည့် ဗလမင်းထင်တံတားစီမံကိန်းကို ၁၉၉၅ ခုနှစ် သြဂုတ်လ (၇) ရက်မှစတင်၍ တည်ဆောက်ခဲ့သည့်အတွက် တံတားကြံ့ခိုင်မှုအားနည်းလာသည့်အပြင် တစ်ရက်လျှင် ယာဉ်အစီးရေ (၄ဝဝဝ)ခန့်သွားလာလျက်ရှိခြင်းကြောင့် တံတားသစ်ကိုတည်ဆောက်ရန်စီစဉ်ခဲ့ခြင်းဖြစ်ကြောင်း သိရသည်။ တံတားသစ်တည်ဆောက်ပြီးပါကလည်း တံတားဟောင်းကို အကြီးစားပြင် ဆင်သွားရန်ရှိကြောင်းသိရသည်။
#NPNews