ရေဘေးသင့်ဒေသ(၅)နေရာအတွက် အလှူပစ္စည်းများကို အခမဲ့ ပို့ဆောင်ပေးမည်ဟု MAI ကြေညာ
963
ယွန်း (NP News) - စက်တင်ဘာ ၁၇
အသင်းအဖွဲ့များမှလှူဒါန်းသည့် ရေးဘေးသင့်ပစ္စည်းများကို တာချီလိတ် အပါအဝင်ရေး ဘေးသင့်ဒေသ (၅)နေရာကို အခမဲ့ပို့ဆောင်ပေး သွားမည်ဖြစ်ကြောင်း MAI က စက်တင်ဘာ(၁၃) ရက်တွင် အသိပေးကြေညာထားသည်။
Myanmar Airways International (MAI) အနေဖြင့် လတ်တလောတွင် အဆိုပါအစီ အစဉ်ကို တာချီလိတ်၊ ကျိုင်းတုံ၊ ဟဲဟိုး၊ မန္တလေးနှင့် နေပြည်တော်တို့၌ အကောင်အထည်ဖော်ဆောင်ရွက်သွားမည်ဖြစ်ကြောင်းသိရသည်။
‘အခုချိန်မှာ ကုန်းလမ်းတွေကလည်း အဆင်မပြေဘူးလေ။ ကုန်စည်ပို့ဆောင်တဲ့ Cargo Service အခမဲ့နဲ့ သယ်ပေးမှာပေါ့။ Cargo သီးသန့် Flight တော့မဟုတ်ဘူး။ ပုံမှန်ခရီးသည်တင်လေ ယာဉ်တွေမှာလည်း လှူဒါန်း ချင်တဲ့အဖွဲ့အစည်းတွေရှိရင် Cargo နဲ့တင်မဟုတ်ဘဲနဲ့ အကုန်လုံးကို ရသလောက် Free သယ်ပေးမှာပါ။ လောလောဆယ်တော့ နေရာ(၅)နေရာကို ပို့ပေးမှာပါ’ဟု MAI မှ တာဝန်ရှိ သူတစ်ဦးက NP News ကို ပြောသည်။
ပစ္စည်းများပို့ဆောင်လိုသည့် အသင်းအဖွဲ့ များအနေဖြင့် စာရွက်စာတမ်းများ လိုအပ်မည်ဖြစ်ပြီး ကိုယ်ထူကိုယ်ထဖြင့် တစ်ဦးတည်းလှူဒါန်းသည့်ပစ္စည်းများကိုမူ ပို့ဆောင်ပေးမည်မဟုတ်ကြောင်း သိရသည်။
‘Personal တစ်ယောက်တည်းက လှူတာမျိုးတော့မရဘူး။ အသင်းအဖွဲ့တွေကနေတစ်ဆင့် လှူတာမျိုးတွေဆို ရင်ရတယ်။ ကိုယ်ထူကိုယ်ထ အနေနဲ့ အလှူငွေတွေ ဘာတွေကောက်လိုက်ပြီး ပစ္စည်းတွေ၊ ဘာတွေပို့မယ်ဆိုရင်တော့ မရဘူး။ အသင်းအဖွဲ့တွေနဲ့ချိတ်ဆက်ပြီး တစ်ဆင့်လှူပေးတာဆိုရင် အဆင်ပြေတယ်။ စာရွက်စာတမ်းတွေတော့ လိုမယ်။ ဟိုဘက်ကိုပို့မယ်ဆိုရင် တစ်ဖက်မှာ ဘာအဖွဲ့အစည်း ရှိလဲဆိုတာမျိုးတွေလိုတယ်။ ကျန်တာကတော့ Flight မှာတင်လို့ရသလောက်ကို တင်ပေးမယ်။ အန္တရာယ်ရှိတဲ့ပစ္စည်းမျိုးတွေဆိုရင်တော့ မရဘူးပေါ့။ Items တွေကတော့ ဘယ်လိုလာမလဲမသိဘူး။ Cargo အတွင်းမှာ သယ်ပေးလို့ရတဲ့ပစ္စည်းမှန်သမျှ အခမဲ့သယ်ပေးမှာပါ’ဟု အထက်ပါ တာဝန်ရှိသူက ဆိုသည်။
လက်ရှိတွင် အဆိုပါအစီအစဉ်ကို ကာလ သတ်မှတ်ထားခြင်းမျိုးမရှိဘဲ လိုအပ်ချက်များပေါ်မူ တည်၍ ဆောင်ရွက်ပေးသွားမည်ဖြစ်ကြောင်း သိရသည်။ ထို့ကြောင့် လှူဒါန်းလိုသည့် အသင်းအဖွဲ့များ အနေဖြင့် ဖုန်းနံပါတ် ဝ၉-၄၂၀ဝ၃၄၆၁၁၊ ဝ၉-၄၃၁၁၀ဝ၇၈ နှင့် Email: [email protected] တို့ကို ဆက်သွယ်စုံစမ်းနိုင်ကြောင်း MAI မှ အသိပေးထားသည်။
လတ်တလောဖြစ်ပေါ်နေသည့် လေပွေလှိုင်းများ ဖြတ်သန်းရာဒေသများနှင့် မြန်မာနိုင်ငံတစ် ဝန်းလုံးတွင် မိုးသည်းထန်စွာရွာသွန်းမှုများပြားခြင်း၊ ဆည်တာတမံများတွင် ရေဝင်ရောက်မှုများလာခြင်းတို့ကြောင့် တိုင်းဒေသကြီး နှင့် ပြည်နယ်အချို့တွင် ရေကြီးရေလျှံမှုများ ဖြစ်ပွားလျက်ရှိသည်။ အလားတူ မြန်မာအမျိုးသား လေကြောင်းလိုင်းက လည်း ရေဘေးသင့်ပြည်သူများထံသို့ ကယ်ဆယ်ရေးပစ္စည်း များနှင့်ဆေးဝါးများ အဆင်ပြေချောမွေ့စွာ ရောက်ရှိစေရန် ပြည်တွင်းပြည်ပခရီးစဉ်များဖြင့် စက်တင်ဘာ ၁၃ ရက်မှစ၍ အခမဲ့သယ်ဆောင်ပေးသွားမည်ဖြစ်ကြောင်း သိရသည်။