ပေါ်ဆန်းမွှေးဆန်များကို ဇူလိုင်(၁)ရက်နေ့မှစ၍ အိမ်အရောက်ပို့စနစ်ဖြင့် ရောင်းချပေးမည်
491
ယွန်း (NP News) - ဇွန် ၂၆
ပေါ်ဆန်းမွှေးဆန်များ အိမ်အရောက်ပို့စနစ်ဖြင့် ရောင်းချပေးသွားမည်ဖြစ်ကြောင်း မြန်မာနိုင်ငံဆန်စပါးအသင်းချုပ်က ဇွန်လ(၂၅)ရက်နေ့တွင် အသိပေးထုတ်ပြန်ထားသည်။
မြန်မာနိုင်ငံဆန်စပါးအသင်းချုပ် အပါအဝင် မြန်မာနိုင်ငံဆန်စက်လုပ်ငန်းရှင်များအသင်း၊ မြန်မာနိုင်ငံဆန်စပါးကုန်သည်များအသင်းတို့၏ ပူးပေါင်းဆောင်ရွက်မှုဖြင့် ပေါ်ဆန်းမွှေးဆန်များကို လာမည့် ဇူလိုင်(၁)ရက်နေ့မှစ၍ ဖြန့်ဖြူးရောင်းချပေးမည်ဖြစ်ကြောင်း သိရသည်။
အဆိုပါအစီအစဥ်အရ ရန်ကုန်မြို့ အပါအဝင် နေပြည်တော်နှင့် မန္တလေးမြို့တို့၌ အိမ်အရောက်ပို့စနစ်ဖြင့် ဖြန့်ဖြူးရောင်းချသွားမည်ဖြစ်ကြောင်း မြန်မာနိုင်ငံ ဆန်စပါးအသင်းချုပ်က ဆိုထားသည်။ ရောင်းချမည့် ဆန်များတွင် ရွှေဘိုပေါ်ဆန်း(၁၀၈)ပေါင် (၂၄)ပြည်တစ်အိတ်လျှင် အိမ်အရောက်ဈေးနှုန်း ငွေကျပ်(၁၅၂၀၀၀)၊ ဧရာဝတီပေါ်ဆန်း (၁၀၈)ပေါင် (၂၄)ပြည်တစ်အိတ်လျှင် ငွေကျပ် (၁၃၀၀၀၀) နှင့် ဧရာဝတီပေါ်ဆန်း (၁၀)ကီလို (၅)ပြည်ခန့် တစ်အိတ်လျှင် (၂၆၅၀၀)ကျပ် သတ်မှတ်ထားကြောင်း သိရသည်။
ဝယ်ယူလိုသူများအနေဖြင့် Viber ဖုန်းနံပါတ်ဖြစ်သည့် ၀၉-၄၀၀၀၆၇၂၄၀၊ ၀၉-၄၀၀၀၆၇၂၅၀၊ ၀၉-၄၀၀၀၆၇၂၆၀ နှင့် Email နံပါတ် [email protected] ကို ဆက်သွယ်မှာကြားနိုင်ကြောင်း ထုတ်ပြန်ချက်တွင် ဖော်ပြထားသည်။ ထို့ပြင် ငွေပေးချေမှုကို KBZ Pay သို့မဟုတ် အခြားနည်းလမ်းဖြင့် ဆောင်ရွက်နိုင်ပြီး ငွေပေးသွင်းပြီးသည့် အချိန်မှစတင်၍ အများဆုံး (၃)ရက်အတွင်း ဆန်အိတ်များကို လိပ်စာပါအတိုင်း အိမ်အရောက်ပေးပို့သွားမည်ဖြစ်ကြောင်း သိရသည်။
အလားတူ MRF အနေဖြင့် အခြားဆန်အမျိုးအစားများနှင့် ထုပ်ပိုးမှုပုံစံအမျိုးမျိုးကိုလည်း အိမ်အရောက်ပို့စနစ်ဖြင့် ဖြန့်ဖြူးနိုင်ရေးကို တိုးချဲ့ဆောင်ရွက်နိုင်ရန် စီစဉ်သွားမည်ဖြစ်ကြောင်း အသိပေးထုတ်ပြန်ထားသည်။ ထို့ပြင် အဆိုပါသတ်မှတ်ဈေးနှုန်းများသည် ရည်ညွှန်းဈေးများနှင့်အညီ သင့်တင့်မျှတသောဈေးနှုန်းများဖြစ်ပြီး ထပ်မံလျော့ချနိုင်ရေးကိုလည်း ဆောင်ရွက်နေခြင်းကြောင့် အမှန်လိုအပ်မှုအတွက်သာမှာယူရန် မြန်မာနိုင်ငံဆန်စပါးအသင်းချုပ်က ထည့်သွင်းအသိပေးထားသည်။